ریاست

ریاست
جے ریاست ہُندی بےبے
چپھی پاء کے سووندی
جیکر راتی نیند نہ آوندی
میرا جی پرچاوندی
جے ریاست ہُندی لالہ
متھا چُم جگاوندی
ٹاکی کپڑا پورا کردی
ہتھاں نال کھواوندی
جے ریاست ہُندی چاچا
کنڈ نہ کدے لواوندی
چنگا ماڑا بھانویں کہندی
بُکل ہیٹھ لُکاوندی
‏جے ریاست ہُندی ماما
پھڑ کے پار لنگاوندی
میرا فیدا لبھدی پھردی
رستے آپ بناوندی
جے ریاست ہُندی پھُپھی
چُپ کدے نہ بہندی
کُڑکُڑ بھانویں کرنی پیندی
سِرے کھلوتی رہندی
جے ریاست ہندی خالہ
رجواں ٹُک کھواوندی
ملدی بھانویں ورھے شماہی
گُھٹ کے سینے لاوندی
‏ایہہ ریاست بےبے لالہ
چاچا ماما کُجھ نئیں
ایہہ ریاست پھپھی خالہ
دل دا چھالا کُجھ نئیں
ایہہ ریاست کچ کلہنڑی
درداں پِٹی مرنے جوگی
میرے لیڑے لتے کھا گئی
روٹی، ٹُکر، بچے کھا گئی
کھا گئی میرے سال سنہڑے
مستقبل نوں گہنے پا گئی
ایہہ ریاست کنجری وانگوں
دل دی تھاں تے روگ بنا گئی
علی عبد اللہ ہاشمی

اس پوسٹ کو شیئر کریں

3 comments

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے