فروری 5, 2023
سعود عثمانی کی اردو نظم

ہریالی کے اتنے رنگ ہیں جتنے رنگ سمندر کے

روز گجر دم اِس وادی میں باغیچوں کا اک غالیچہ کھلتا ہے

کاہی سے انگوری تک کے تیز اور ہلکے رنگ

لغت میں اِس وادی سے پہنچے ہیں

لیکن پھر بھی

سرخ اور زرد پہاڑوں کی پُر ہیبت عظمت

سبزے کی آرائش سے انکاری ہے

اس کہسار کی ہر اک چوٹی ہریالی سے عاری ہے

یوں لگتا ہے

ایک خطِ سیراب سے اُوپر

برگ و بار کی ہر اک خواہش پتھر ہوتی جاتی ہے

دیکھو

اپنے دل میں دیکھو

ہریالی اک حد سے آگے بنجر ہوتی جاتی ہے

سعود عثمانی

اس پوسٹ کو شیئر کریں

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے